Esta acción capitaliza directamente a experiencia obtida do programa de mentorización para Pemes e do ciclo de webinars en materia de RSE desenvolvidos no marco da acción “Compromiso Social por un emprego de calidade” de GEMCAT. Consiste o proporcionar un espazo formativo en liña baseado nunha plataforma de teleformación, que, a modo de proxecto piloto, dispoña de funcionalidades innovadoras para facilitar a experiencia de aprendizaxe por parte das persoas traballadoras en pemes a ambos os dous lados da fronteira entre Galicia e o Norte de Portugal.

O espazo virtual transfronteirizo piloto, albergará un catálogo variado de accións formativas gratuítas, impartidas por docentes expertos en materia de igualdade laboral e RSE, e enmarcadas en diferentes ámbitos relacionados coa igualdade efectiva entre homes e mulleres como a conciliación e a corresponsabilidade, o acoso laboral, ou teletraballo etc. Os tres socios do proxecto promoverán a organización destes cursos en liña.

Celebración de 3 foros transfronteirizos abertos a empresas de todos os sectores económicos, introducindo en cada un deles, segundo onde se celebren, énfase nos sectores que durante o desenvolvemento de GEMCAT foron considerados estratéxicos para as rexións socias (industria 4.0, automoción, téxtil e agroalimentario). Os foros serán o marco para a posta en valor dos diferentes coñecementos, experiencias, boas prácticas etc., sobre unha materia como é a Igualdade laboral no marco da Responsabilidade Social Empresarial. Buscarase extraer unha visión teórica a partir das experiencias compartidas en senllos foros, que se plasmará nun documento de conclusións que sirva para atraer o interese de novas entidades doutras rexións do espazo de cooperación POCTEP de fronte ao desenvolvemento do Campus de Igualdade Laboral Ibérico.